Kvikmyndamiðstöð Íslands býður kvikmyndagerðarmönnum til fundar í Bíó Paradís þann 23. apríl klukkan 16. Farið verður yfir stöðu kvikmyndagerðar á Íslandi í kjölfar niðurskurðar til Kvikmyndasjóðs auk fleiri mála, þeirra á meðal endurgreiðslukerfi Atvinnuvega- og nýsköpunarráðuneytisins. Nýr formaður nefndar um endurgreiðslu kvikmynda, Helga Haraldsdóttir, mun ræða kerfið og svara fyrirspurnum.

Önnur mál á dagskrá eru meðal annars rafrænar umsóknir til Kvikmyndasjóðs og streymismál, þar sem farið er yfir áætlun Kvikmyndamiðstöðvar um að segja skilið við notkun DVD diska og taka upp streymiskerfi.

Kvikmyndahátíð í Reykjavík hefur nú verið endurvakin  eftir 13 ára hlé og fer fram dagana 12.-21. september næstkomandi. Það er sjálfseignarstofnunin Heimili kvikmyndanna ses. sem stendur fyrir hinni endurvöktu hátíð. Kvikmyndahátíð í Reykjavík er sjálfseignarstofnun sem starfar með það að markmiði að efla og styrkja kvikmyndamenningu og -iðnað á Íslandi og er hátíðin ekki haldin í hagnaðarskyni.
Markmið með endurvakningu Kvikmyndahátíðar í Reykjavík er að skapa viðburð í samvinnu og samstöðu allra sem málið varða og annast framkvæmd hennar og stjórnun á sem faglegastan hátt. Hátíðin mun veita almenningi aðgang að rjómanum af þeim kvikmyndum sem hafa hlotið verðlaun og viðurkenningar á stærstu kvikmyndahátíðum heims þar sem áherslan er lögð á gæði frekar en magn kvikmynda. Áhorfendaverðlaun hátíðarinnar verða veitt við hátíðlega athöfn á lokahófi hennar, en einnig verður alþjóðlegur verðlaunaleikstjóri heiðraður.
Á meðal gesta, verða þekktir verðlaunaleikstjórar og aðrir alþjóðlegir kvikmyndagerðarmenn. Áhersla verður lögð á að sýna það nýjasta úr kvikmyndagerð heimsins og einnig verður sérstök áhersla lögð á tengslamyndun íslenskra og erlendra kvikmyndagerðarmanna.
Hátíðin verður samstarfsverkefni allra hagsmunaaðila í kvikmyndageiranum á Íslandi er markmiðið með hinni endurvöktu hátíð að þjóna samfélaginu sem hún sprettur úr, efla og auðga kvikmyndamenningu á Íslandi árið um kring og vera íslenskum kvikmyndaiðnaði lyftistöng bæði erlendis og innanlands. Allt kapp verður lagt á að starfrækja Kvikmyndahátíð í Reykjavík á faglegan, gagnsæjan og lýðræðislegan hátt með stjórn skipaðri úr fagfélögum kvikmyndaiðnaðarins.
Starfsfólk hátíðarinnar mun tileinka sér fagleg og ábyrg vinnubrögð gagnvart samstarfsaðilum, gestum og öðrum starfsmönnum. Erlendum blaðamönnum úr helstu og þekkstustu fjölmiðlum heims verður boðið að sækja hátíðina heim en sérleg upplýsingamiðstöð hátíðarinnar verður stofnuð til að taka á móti gestum hennar.
Af þessu tilefni er vefsíða hátíðarinnar opnuð í dag, reykjavikfilmfest.is en hún verður bæði aðgengileg á íslensku og á ensku.
Stjórn hátíðarinnar skipa Friðrik Þór Friðriksson, Guðrún Edda Þórhannesdóttir, Birna Hafstein, Dögg Mósesdóttir, Bergsteinn Björgúlfsson og Sjón. Framkvæmdastjórn skipa Hrönn Sveinsdóttir, framkvæmdastjóri Heimili kvikmyndanna ses.; Ása Baldursdóttir, dagskrárstjóri Bíó Paradísar og Guðmundur E. Finnsson, viðburðastjóri Kvikmyndahátíðar í Reykjavík.

Stjórn hátíðarinnar frá vinstri: Bergsteinn Björgúlfsson, Birna Hafstein,  Dögg Mósesdóttir, Guðrún Edda Þórhannesdóttir, og Sjón. Á myndina vantar Friðrik Þór Friðriksson.

Ný stjórn Félags kvikmyndagerðarmanna efri röð frá vinstri Sigríður Rósa Bjarnadóttir, Anna Þóra Steinþórsdóttir, Bergsteinn Björgúlfsson, Rebekka A. Ingimundardóttir, Hrafnhildur Gunnarsdóttir, Fahad Falur Jabali, Stefanía Thors og Guðbergur Davíðsson. Neðri röð sitja þrír af nýjum heiðursfélögum FK: Gísli Gestsson, Karl G. Jeppesen, og Páll Steingrímsson.
 

NÝ STJÓRN FK KOSIN
Ný stjórn var kosin á aðalfundinum þar sem að Sigríður Rósa Bjarnadóttir og Hákon Már Oddson tóku sæti í stjórninni. Anton Máni Svansson og Ósk Gunnlaugsdóttir gáfu ekki kost á sér aftur og er þeim þakkað fyrir störf sín fyrir hönd kvikmyndagerðarmanna. Ný stjórn er því skipuð Hrafnhildi Gunnarsdóttur formanni, Stefaníu Thors varaformanni, Önnu Þóru Steinþórsdóttur, Bergsteini Björgúlfssyni, Fahad Fali Jabali, Guðbergi Davíðssyn, Hákoni Má Oddssyni, Rebbekku Ingimundardóttir og Sigríði Rósu Bjarnadóttur. Stjórn á eftir að skipta með sér störfum sem verður gert á fyrsta stjórnarfundi.

6 FÉLÖGUM VEITT HEIÐURSFÉLAGANAFNBÓT
Sex félögum var veitt heiðursfélaganafnbót á aðalfundi félagsins. Það voru þeir: Andrés Indriðason, Gísli Gestsson, Guðmundur Guðmundsson, Hjálmtýr Heiðdal, Karl G. Jeppesen og Páll Steingrímsson. Þeir hljóta heiðursfélagatitilinn fyrir vel unnin störf í kvikmyndagerð. Samkvæmt lögum Félags kvikmyndagerðarmanna er heiðursfélagi Félags kvikmyndagerðarmanna annars vegar sæmdarheiti, sem hlotnast mönnum fyrir mikilsvert framlag þeirra til eflingar félaginu og/eða kvikmyndagerðarmönnum og konum sem eiga að baki farsælan starfsferil sem kvikmyndagerðarmenn. Allir þeir félagsmenn sem ná 67 ára aldri og hafa verið félagsmenn í FK í a.m.k. 5 ár skuldlaust verða sjálfkrafa heiðursfélagar. Við óskum heiðursfélögum til hamingju og þökkum þeim fyrir vel unnin störf.